Ўзбекистон миллий терма жамоаси бош мураббийи Фабио Каннаваро ва журналистлар ўртасида матбуот анжумани бўлиб ўтди. Унда терма жамоа устози ва Ўзбекистон футбол ассоциацияси биринчи вице-президенти Равшан Эрматов иштирок этиб, жаҳон чемпионати тайёргарлиги ҳамда бўлажак режалар ҳақида маълумот берди.
Анжуман аввалида Равшан Эрматов терма жамоанинг мундиалгача босиб ўтган йўли, АҚШ сафари ва Канада ҳамда Нидерландия билан ўтказиладиган ўртоқлик ўйинлари ҳақида тўхталиб ўтди. Шундан сўнг, миллий жамоа бош мураббийи Фабио Каннаваро журналистлар саволларига жавоб қайтарди.
Таркиб ва танлов ҳақида «Ўзбекистонга келганимдан буён барча футболчиларни кузатиб бордик ва шуларни инобатга олган ҳолда таркибни шакллантирдик. Кимлардир чақирилмаган бўлса, демак уларнинг ўйини менда ёрқин қизиқиш уйғотмаган. Масалан, Азизбек Турғунбоевни ҳурмат қиламан, аммо унинг феъл-атвори ва айни вақтдаги ўйинлари менда ишонч уйғотмади. Агар у ўз устида ишлашда давом этса, кейинчалик таклиф этаман. Ҳусайн Норчаев ва Аббосбек Файзуллаев каби футболчилар эса мундиалда асқотади», деди мураббий.
Жисмоний ҳолат ва тайёргарлик Каннаваро миллий чемпионат темпининг пастлиги сабабли, лига билан келишган ҳолда ўйинларни вақтинча тўхтатиб, жисмоний ҳолат устида алоҳида ишланаётганини билдирди: «Машғулотларда футболчилар қийналмоқда, аммо ҳеч ким эътироз билдирмасдан ўз ишини бажаришга ҳаракат қилмоқда. Менга „жангчилар“ керак. Футболчиларим ҳеч нарсадан қўрқмаслигини, қўпол қилиб айтганда „от каби“ бўлишларини хоҳлайман. Чунки Колумбия, Португалия ва Конго каби рақиблар билан осон бўлмайди».
Рақиблар танлови ва замонавий футбол Нега айнан Канада ва Нидерландия танлангани борасидаги саволга мураббий шундай жавоб берди: «Канада — мезбон, улардан ўрганишимиз керак бўлган нарсалар бор. Нидерландия эса ўйин услуби жиҳатидан қисман Португалияга ўхшайди ва жисмоний жиҳатдан жуда кучли». Шунингдек, у стандарт вазиятлар устида ишлаш замонавий футболда жуда муҳимлигини, бу орқали мавсумда 15–20 та гол уриш мумкинлигини таъкидлади.
Мундиал ва Осиё кубоги «Биздан кўп нарса кутишяпти, ҳатто чемпионликни кутаётганлар бор. Бироқ биринчи мундиал бўлгани учун футболчиларга босим юкламаслик керак. Уларнинг шунчаки завқланишини айтяпман. Осиё кубогига келсак, Иордания билан бир гуруҳдан жой олганимиз қизиқ бўлди. Менинг асосий мақсадларимдан бири ҳам айнан Осиё кубогида ғалаба қозонишдир», деди Каннаваро.
Мухлислар ва фаворитлар Мураббий Италия халқи ҳам Ўзбекистонга мухлислик қилишига умид билдирди. Жаҳон чемпионати фаворитлари сифатида эса Франция, Португалия, Аргентина, Испания ва Англия терма жамоаларини кўрсатиб ўтди.
Мулоқот якунида Фабио Каннаваро яратилган шароитлар учун мамлакат Президенти Шавкат Мирзиёевга ўз миннатдорчилигини билдирди.
