"Челси"нинг собиқ ҳимоячиси Давид Луис Лондон клубидаги ҳозирги вазият ҳақида ўз фикрини билдирди.

"Менимча, қайта қуриш жараёни доимо қийин кечади, айниқса гап "Челси"дек миқёсдаги клуб ҳақида кетганда; бу янада мураккаб вазифадир. Ҳамма "Челси"дан совринлар ютишни ва ақл бовар қилмайдиган даражада ўйин кўрсатишни кутади, шунинг учун босим доимо мавжуд бўлади. Умид қиламанки, клубдаги инсонлар ғолиблик менталитетини қайта топа оладилар ва буни қўлга киритилган кубокларда исботлайдилар. Менинг фикримча, сўнгги 20 йил ичида "Челси" Англиянинг энг муваффақиятли клуби бўлди, шундай экан, биз ўтмишни унутмаслигимиз керак. Ўйлайманки, ҳамма клубга ишонишда ва уни севишда давом этиши, шунингдек, ушбу оғир дамларни енгиб ўтишда жамоага ёрдам беришга ҳаракат қилиши лозим", — деди Луис Исмаэль Маҳмудга берган интервьюсида.

Ҳозирги вақтда "Челси" Англия Премьер-лигаси турнир жадвалида 36 турдан сўнг 49 очко жамғариб, тўққизинчи ўринни эгаллаб турибди.