Лондоннинг «Челси» клубига тегишли бўлган ва ҳозирда ижара асосида Мюнхеннинг «Бавария» жамоасида тўп сураётган Николас Жексон трансфер бозорида талабгир бўлиб турибди. Бу ҳақда Bild нашри хабар тарқатди.

Манбанинг берган маълумотига кўра, футболчини ўз сафига қўшиб олишга бир вақтнинг ўзида бир нечта жамоалар даъвогарлик қилмоқда. Хусусан, Туриннинг «Ювентус», «Милан», Туркиянинг «Фенербаҳче» ҳамда Саудия Арабистонининг «Ал-Аҳли» клублари ҳужумчининг трансфери бўйича қизиқиш билдирган.

Маълумот учун, Жексон жорий мавсумда немис гранди сафида жами 29 та учрашувда иштирок этди. Ушбу баҳсларда футболчи 10 та гол ва 4 та голли узатмани амалга оширишга муваффақ бўлган.

Эслатиб ўтамиз, Николас Жексоннинг «Челси» билан амалдаги шартномаси 2033 йилнинг ёзига қадар мўлжалланган.