Футбол бўйича 2026 йилги жаҳон чемпионати 11 июндан 19 июлга қадар Шимолий Американинг уч давлати — АҚШ, Канада ва Мексикада бўлиб ўтади. Ушбу мундиал футбол тарихида илк бор янги форматда, яъни 48 та терма жамоа иштирокида ташкил этилади. Таққослаш учун, 1998 йилдан 2022 йилгача бўлган мусобақаларда 32 та жамоа иштирок этиб келган.
Турнир баҳслари жами 16 та шаҳарда ўтказилади. АҚШнинг 11 та (Атланта, Бостон, Даллас ва бошқалар), Мексиканинг 3 та (Гвадалахара, Мехико, Монтеррей) ва Канаданинг 2 та (Торонто, Ванкувер) шаҳри футбол байрамига мезбонлик қилади.
ФИФА томонидан тасдиқланган қоидаларга кўра, терма жамоаларнинг якуний қайдномасидан 23 нафардан 26 нафаргача футболчи жой олиши мумкин. Уларнинг камида 3 нафари дарвозабон бўлиши шарт.
Таркибларни эълон қилишнинг муҳим муддатлари:
-
11 май: 35–55 нафар футболчидан иборат дастлабки кенгайтирилган рўйхатни топширишнинг сўнгги куни.
-
25 май: Миллий жамоага чақирилган барча футболчилар номини эълон қилиш муддати тугайди.
-
25 май — 1 июнь: Федерациялар 26 нафар футболчидан иборат якуний таркибни эълон қилиши лозим.
-
2 июнь: ФИФА барча жамоаларнинг якуний қайдномасини расман тасдиқлайди.
Шунингдек, регламентга кўра, агар бирор футболчи жиддий жароҳат олса, жамоа ўзининг турнирдаги илк ўйини бошланишига 24 соат қолгунга қадар уни бошқа ўйинчи билан алмаштириш ҳуқуқига эга.
