Англия Премьер-лигасининг навбатдаги турида «Манчестер Сити» ўз майдонида «Кристал Пэлас»ни 3:0 ҳисобида мағлуб этди ва пешқадам «Арсенал» билан орадаги фарқни 2 очкогача қисқартирди. Чемпионат якунига икки тур қолган бир пайтда, «шаҳарликлар»га кетма-кет чемпионлик учун лондонликларнинг камида бир марта очко йўқотиши зарур бўлади.
Жамоа бош мураббийи Хосеп Гвардиола Sky Sports нашрига берган интервьюсида юзага келган вазиятга реал баҳо берди.
«Афсуски, кўплаб сабабларга кўра вазият ҳозир бизнинг қўлимизда эмас. Лекин жамоада руҳият аъло даражада. Олдинда бизни яна бир кубок финали кутмоқда», — дейди мутахассис.
Шунингдек, Гвардиола АПЛдаги бўлажак рақиблар — «Борнмут» ва «Астон Вилла»нинг кучини ҳам эътироф этди:
«Борнмут» ва «Астон Вилла» — осон рақиблар эмас. Айниқса, еврокубоклар учун курашаётган «Борнмут»нинг охирги марта қачон ютқазганини эслай олмайман. Аммо ҳозир барча хаёлимиз «Челси»га қарши финал баҳси билан банд».
Эслатиб ўтамиз, Англия Кубогининг финал учрашуви шу ҳафтанинг шанба куни, 16 май санасида бўлиб ўтади.
