«Борнмут» клуби Маркос Сенесининг шартномаси муддати тугаши муносабати билан шу ёзда жамоадан кетишини эълон қилди. Аргентиналик ҳимоячи инглиз жамоаси сафида тўрт мавсумни ўтказди.
Журналист Бен Жейкобснинг маълумотига кўра, «Борнмут» унинг кетиши ҳақида ҳали ўтган йилиёқ билган ва томонлар Сенеси жамоани январь ойида тарк этмаслиги борасида келишиб олишган эди.
«Тоттенхэм» 29 ёшли футболчи билан аллақачон келишувга эришган ва агар Премьер-лигадаги ўрнини сақлаб қолса, у билан шартнома имзолаши мумкин. Шунингдек, «Манчестер Юнайтед» ҳам Маркосга қизиқиш билдирган. «Ливерпуль» эса ҳозирча бирор бир қадам ташлаш борасида якуний қарорга келгани йўқ. Бу вазият мерсисайдликлар клубида Ибраима Конатенинг қолиш ёки қолмаслигига боғлиқ бўлиши мумкин.
