Мадриднинг «Атлетико» клуби бош мураббийи Диего Симеоне ҳужумчи Антуан Гризманннинг ўрнини босадиган футболчи ҳақидаги саволга жавоб берди. 35 ёшли франциялик футболчи аллақачон «Орландо Сити» клуби билан шартнома имзолаб бўлган. Форвард мавсум якунланганидан кейин «матрасчилар» билан хайрлашади.
«Бундай иқтидорга эга бошқа бир футболчи ҳеч қачон бўлмаслиги кундек равшан. Гризманн ва Коке жамоанинг энг тажрибали икки ўйинчиси сифатида барчани ўз ортидан эргаштира оларди. Бу алоҳида масъулият ва рол бўлиб, уни тушунтириб бериш қийин. Энди биз худди шундай масъулиятни ўз зиммасига ола биладиган бошқа бир инсонни топишимиз керак», — дея испаниялик ОАВ Симеоненинг сўзларини келтирмоқда.
Бугун Антуан Гризманн «Атлетико»нинг жорий мавсумдаги сўнгги уй учрашувида «Метрополитано» стадиони мухлислари билан хайрлашади. Мадридликларга ушбу баҳсда «Жирона» жамоаси рақиблик қилади.
