Англия Премьер-лигасининг 37-тури доирасида «Манчестер Юнайтед» ўз майдонида «Ноттингем Форест» жамоасини қабул қилди. «Олд Траффорд» стадионида кечган шиддатли баҳсда мезбонлар 3:2 ҳисобидаги қийин ғалабани қўлга киритишди.
Учрашувда «МЮ» сафида Люк Шоу, Матеус Кунья ва Брайан Мбемо рақиб дарвозасини ишғол қилган бўлса, меҳмонлардан Морату ва Морган Гиббс-Уайт ўз номини таблога ёздириб қўйди.
Мазкур баҳс «Манчестер Юнайтед» ярим ҳимоячиси Бруну Фернандеш учун тарихий аҳамиятга эга бўлди. Португалиялик футболчи учрашувда жорий АПЛ мавсумидаги ўзининг 20-голли узатмасини амалга оширди ва Тьерри Анри ҳамда Кевин де Брюйнега тегишли бўлган мутлақ рекордни такрорлади.
Ушбу ғалабадан сўнг «Манчестер Юнайтед» ўз очколарини 68 тага етказиб, турнир жадвалида 3-ўринни мустаҳкамлади. «Ноттингем» эса 43 очко билан 16-поғонада бормоқда.
Маълумот учун, АПЛнинг сўнгги турида «қизил иблислар» «Брайтон» меҳмони бўлишса, «ўрмончилар» ўз уйида «Борнмут»ни қабул қилади. Ўйинлар 24 май куни бўлиб ўтади.
«МАНЧЕСТЕР ЮНАЙТЕД» — «НОТТИНГЕМ ФОРЕСТ» — 3:2
Голлар: Люк Шоу 5 (1:0), Морату 53 (1:1), Матеус Кунья 55 (2:1), Брайан Мбемо 76 (3:1), Морган Гиббс-Уайт 78 (3:2).
«Манчестер Юнайтед»: Ламменс, Шоу, Мартинес, Магуайр, Далот, Майну, Каземиру (Маунт, 81), М. Кунья (Доргу, 80), Бруну Фернандеш, Диалло, Мбемо (Зиркзе, 80).
«Ноттингем Форест»: Селс, Нец (Ж. Кунья, 84), Морату, Миленкович, Уильямс, Гиббс-Уайт, Андерсон, Домингес (Сангаре, 70), Хатчинсон (Баква, 70), Вуд (Авонийи, 70), Игор Жезус (Макэйти, 84).
Огоҳлантиришлар: Каземиру (78), Шоу (90) — Андерсон (90).
