Ярим ҳимоячи Каземиро «Олд Траффорд»даги сўнгги ўйинини ўтказди, чунки мавсум якунида бразилиялик футболчи «Манчестер Юнайтед»ни тарк этади.

Якшанба куни «Ноттингем Форест»га қарши кечган баҳсда Каземиро учрашув якунланишига оз қолганда захирага олинди. Мухлислар бразилияликни тик туриб, гулдурос қарсаклар билан кузатиб қўйишди.

«Футболчиларга раҳмат, штабга раҳмат, ҳаммага раҳмат. Лекин бу клубдаги энг яхши нарса — сиз, мухлисларсиз. Раҳмат сизга», — дея Каземиронинг сўзларини келтиради BBC.

Тўрт йил давомида Каземиро «Манчестер Юнайтед» сафида 160 та расмий ўйин ўтказиб, 26 та гол урди ва 14 та голли узатмани амалга оширди. «Манчестер Юнайтед» Премьер-лига турнир жадвалида учинчи ўринни нақд қилиб бўлган.