Англия ҳакамлар корпуси «Манчестер Юнайтед» ҳужумчиси Матеус Куньянинг «Ноттингем Форест» дарвозасига урган голи хатолик туфайли ҳисобга олинганини тан олди.
АПЛнинг 37-туридан ўрин олган ушбу учрашувда «МЮ» ўз майдонида 3:2 ҳисобида ғалаба қозонган эди.
Баҳснинг 55-дақиқасида манкунианликлар ҳимоячиси Диогу Далот жарима майдончаси марказига тўпни узатди, Бриан Мбемо эса уни қабул қилиб олишга уринди. Тўп ярим ҳимоячининг сонидан сўнг қўлига тегди. Шундан сўнг Кунья тўпни дарвоза тўрига жойлаб қўйди. Бош ҳакам Майкл Солсбери видеоассистент (VAR) билан маслаҳатлашиб, вазият такрорини ўрганиб чиққач, голни ҳисобга олишга қарор қилган эди.
Sky Sports нашрининг хабар беришича, Англияда ҳакамлик учун масъул бўлган PGMOL ташкилоти Куньянинг голини ҳисобга олмаслик керак бўлганини тан олди. Душанба куни PGMOL раҳбари Ховард Уэбб «Ноттингем Форест» ва «Манчестер Юнайтед» клубларига баёнот билан чиқиб, ҳакамнинг хатосини расман тан олди.
