Мадриднинг «Реал» клуби ҳимоячиси ва сардори Даниэль Карвахаль жамоани мавсум якунида эркин агент сифатида тарк этиши ҳақида фикр билдирди.

Испаниялик футболчи «қаймоқранглилар» либосидаги суратини ижтимоий тармоқларга жойлаб, унга қисқа изоҳ қолдирди.

— Мен бу клуб учун бор кучимни берганимни билиб, қалбим тўлиб ва абадий фахр ҳисси билан кетмоқдаман, — деб ёзди Карвахаль.

Даниэль Карвахаль «Реал» тарбияланувчиси ҳисобланади. У мадридликлар сафида жами 450 та учрашувда майдонга тушиб, 14 та гол ва 65 та ассист қайд этган.

«Қироллик клуби» сафида ҳимоячи 27 та соврин қўлга киритган бўлиб, бу клуб тарихидаги иккинчи энг яхши натижа ҳисобланади. Карвахаль олти марта Чемпионлар лигаси, беш мартадан УЕФА Суперкубоги ва клублар ўртасидаги Жаҳон чемпионати, тўрт марта Испания чемпионати ва мамлакат Суперкубогида ғолиб чиққан. Шунингдек, унинг ҳисобида иккита Испания Кубоги ва битта Қитъалараро кубок ҳам бор.