Каталониянинг "Барселона" клуби ҳужум чизиғини кучайтириш мақсадида Мюнхеннинг "Бавария" клуби форварди Ҳарри Кейн номзодини ўрганмоқда. Бу ҳақда Испаниянинг нуфузли SPORT нашри хабар бермоқда.

Манбанинг қайд этишича, инглиз ҳужумчиси жамоани тарк этадиган Роберт Левандовскининг ўрнини боса оладиган энг муносиб номзодлардан бири сифатида кўрилмоқда. Кўплаб "Барселона" мухлислари учун ҳам Кейн қисқа фурсатда юқори натижа бера оладиган идеал ҳужумчи ҳисобланади. Кейн катта тажрибага эга ва ўта сермаҳсул форвард бўлишига қарамай, фаолияти давомида совринларга бой бўлмагани сабабли унда ҳамон юқори мотивация мавжуд. Клуб раҳбарияти унинг трансферини ўз вақтида Левандовски билан бўлгани каби 3-4 йиллик муваффақиятли лойиҳага айланиши мумкин деб ҳисобламоқда.

Бироқ бу трансферни амалга ошириш жуда мураккаб вазифа ҳисобланади. Айни пайтда 32 ёшда бўлган ҳужумчи "Бавария" клубида ўзини тўлиқ бахтли ҳис қилмоқда ва Мюнхенни ЕЧЛда ғолиб чиқиш учун энг мақбул макон деб билади.

Бундан ташқари, футболчининг шартномасида аниқ белгиланган товон пули банди мавжуд эмас ва "Бавария" раҳбарияти ўз етакчисининг кетишига осонликча рухсат бермоқчи эмас.

Эслатиб ўтамиз, Ҳарри жорий мавсумда мюнхенликлар таркибида барча турнирларда 50 та учрашувда майдонга тушиб, рақиблар дарвозасига 58 та гол уришга муваффақ бўлди.