«Арсенал» клубининг собиқ ярим ҳимоячиси Патрик Виейра 2003/04 йилги мавсумдаги «Енгилмас жамоа» (The Invincibles) ва клубнинг ҳозирги таркиби футболчиларидан иборат бирлашган рамзий жамоани тузиб чиқди.

Франциялик собиқ футболчи ўз рамзий терма жамоасига «Арсенал»нинг ҳозирги таркибидан беш нафар ўйинчини киритди.

«Менимча, дарвозада Леманннинг ўрнига Райя бўлади. Ҳимоянинг ўнг қанотида Тимбер — у менга жуда ёқади, таркибга кира олади деб ўйлайман. Туре ва Кэмпбелл жуфтлигидан бирини алмаштирган бўлардим — Кэмпбеллни қолдириб, Туренинг ўрнига Габриэлни қўяман.

Албатта, Эшли Коул — муҳокамасиз, унга тегинмаймиз. Сака ўнг қанот ярим ҳимоясида Юнгбергнинг ўрнини эгаллаши мумкин. Ҳужумда Тьерри Анри ва Деннис Бергкампга тегмаймиз. Жилбертонинг ўрнига Деклан Райс, чап қанотда эса Робер Пирес қолади.

Агар жамоанинг бир неча йил олдинги ҳолати ва бугунги кунда қаерда турганлигини эсласак, Артета ҳақиқатан ҳам ажойиб иш олиб борди деб ўйлайман.

Шунингдек, у жуда кўп пул сарфлади. Арсен Венгерга келадиган бўлсак, айнан у мени ва Тьеррини жуда манфаатли шартларда клубга олиб келганди, шу сабабли мураббий сифатида Арсенни танлайман», – деди Виейра Sky Sports эфирида.

Якуний таркиб (4-4-2): Райя; Тимбер, Кэмпбелл, Габриэл, Коул; Сака, Райс, Виейра, Пирес; Анри, Бергкамп.

Мураббий: Арсен Венгер.