«Астон Вилла» бош мураббийи Унаи Эмери ушбу мусобақада 4 марта ғолиб чиққанига қарамай, ўзини Европа Лигасининг «қироли» деб ҳисобламаслигини маълум қилди. Испаниялик мутахассис мазкур турнирда уч марта «Севилья» ва бир марта «Вильярреал» билан зафар қучган, 20 май куни эса уни Германиянинг «Фрайбург» клубига қарши навбатдаги финал кутиб туриббди.
«Мен бу турнирнинг қироли эмасман. Ҳозир «Астон Вилла» билан фаолиятимда янги саҳифа очилди. Илгари бўлган воқеаларнинг барчаси ўтмишда қолди. Эртага ҳозирги жамоам билан ва айни дамдаги рақибга қарши баҳсда ғалаба қозонишимиз керак», — дея мураббийнинг сўзларидан иқтибос келтирмоқда ESPN.
Эмери бошқаруви остида «Вилла» еврокубокларда жиддий ўсишга эришди. Жумладан, жамоа 2024 йилда Конференциялар Лигаси ярим финалига, бир йил ўтиб Чемпионлар Лигаси чорак финалига қадар етиб борди, энди эса сўнгги 30 йил ичидаги илк йирик соврин остонасида турибди. Бирмингемликларнинг охирги жиддий муваффақияти 1996 йилга тўғри келади — ўшанда улар Англия Лига кубогини қўлга киритишган эди. Жамоа ўзининг сўнгги еврокубогини эса ундан ҳам аввалроқ, яъни 1982 йилда Европа чемпионлари кубогида ғолиб чиқиб қўлга киритган.
Эмери жамоа катта ўйинлардаги босимни енгиб ўтишни ўрганганини ва буни ижобий омил сифатида қабул қилиши кераклигини таъкидлади. «Босим ҳамиша бор, лекин уни позитив қабул қилиш лозим. У фақат ҳақиқатан ҳам муҳим бўлган нарса учун курашаётганингда пайдо бўлади», — деди мутахассис.
Мураббий, шунингдек, «Вилла» учун мавсум жуда оғир бошланганини, жамоа барча турнирлардаги дастлабки 6 та ўйиннинг бирортасида ҳам ғалаба қозона олмаганини эслатиб ўтди: «Мавсум бошланишидан тўғриси жуда хавотирда эдим. Аммо футболчиларнинг қийинчиликларга кўрсатган реакцияси ҳайратланарли бўлди. Биз улғайганлик ва масъулиятни ҳис қила олиш фазилатини намойиш этдик».
Эслатиб ўтамиз, мазкур учрашувнинг старт ҳуштаги Тошкент вақти билан соат 00:00 да янглайди.
