Микель Артета мураббийлик фаолиятидаги навбатдаги совринга эга чиқди.

«Манчестер Сити» клуби АПЛ 37-турида «Борнмут»ни мағлуб эта олмаганидан сўнг (1:1), «Арсенал» муддатидан олдин Англия чемпионлигини нақд қилди.

Бу Артета учун мураббий сифатидаги тўртинчи титул бўлди ва у ушбу совринларнинг барчасини «канонирлар» бошқарувида қўлга киритган. Испаниялик мутахассис 2019/20 йилги мавсумда Англия Кубогида зафар қучган бўлса, 2020 ва 2023 йилларда мамлакат Суперкубогида ғолиб чиққан эди.

Англия чемпионатидаги ушбу ғалаба Артета учун ҳам мураббий, ҳам футболчи сифатида биринчиси бўлди: собиқ ярим ҳимоячи ўз вақтида «Арсенал» либосида тўп сурган кезларида икки мартадан Англия Кубоги ва Суперкубогида ғолибликни қўлга киритган, аммо чемпион бўла олмаган эди.

Эслатиб ўтамиз, испаниялик мутахассис 2019 йилнинг декабрь ойидан буён «Арсенал» клубини бошқариб келмоқда.