Англиянинг «Борнмут» клуби «Манчестер Сити» устидан қозониладиган ғалабага жуда яқин келганди, бироқ ҳакам томонидан қўшиб берилган вақтда гол ўтказиб юборди ва уч очко ўрнига атиги бир очко билан кифояланди. Шунга қарамай, Андони Ираола шогирдлари ўзларининг ақл бовар қилмас сериясини узайтиришди — улар АПЛда кетма-кет 17 та ўйиндан бери мағлубият нималигини билишмаяпти!

Бу ҳозирги вақтда Англия футболи юқори дивизионидаги давом этаётган энг узоқ серия ва клуб тарихидаги энг яхши кўрсаткичдир. Шунингдек, жорий мавсумдаги муваффақиятлар клубга кейинги мавсум учун еврокубокларга йўлланма тақдим этганини ҳам қайд этиш лозим. Бундай воқеа ҳам «гилослар» тарихида илк бор юз бермоқда. АПЛнинг сўнгги турида улар «Ноттингем Форест»га қарши майдонга тушишади.