«Манчестер Сити» ярим ҳимоячиси Бернарду Силва клубдан кетмаслиги учун уни кўндиришга ҳаракат қилишганини тан олди.

«Шаҳарликлар» сардори мавсум якунланганидан кейин эркин агент мақомида жамоани тарк этади. Футболчи муддати тугаб бораётган шартномасини узайтирмасликка қарор қилган.

«Клубдагилар мени қолишга кўндиришга уринишди, аммо якунда барибир позициям ўзгармаслигини тушунишди ва вақт ўтиши билан босим қилишни тўхтатишди. Айримлар барибир ишонгиси келмади, ваҳоланки, Рубен Диаш ва Матеус Нунес аллақачон якуний қарорга келиб бўлганимни билишарди. Мен расмий баёнотлар бермадим, лекин доим шартномамни охиригача бажаришимни ва кейин кетишимни айтганман», – дея 31 ёшли хавбекнинг сўзларидан иқтибос келтирмоқда «City Xtra».

Маълумот учун, Бернарду Силва 2017 йилдан буён «Манчестер Сити» шарафини ҳимоя қилиб келмоқда.