«Манчестер Сити» ўз уй стадионидаги трибуналардан бирини Пеп Гвардиола шарафига қайта номлади ва мураббийга аталган ҳайкални ўрнатади.

Бугун «шаҳарликлар» ва мураббий 55 ёшли каталониялик мутахассис ўз лавозимини тарк этишини эълон қилишди. У клубдаги 10 йил давомида 20 та совринни қўлга киритди, жумладан, 2023 йилда «Сити» тарихида илк бор Чемпионлар лигаси бош совринини қўлга киритди.

Клубнинг хабар беришича, яқинда реконструкция қилинган ва кенгайтирилган «Этихад Стэдиум»нинг Шимолий трибунаси энди «Пеп Гвардиола трибунаси» деб аталади.

Трибуна мураббийнинг клубдаги сўнгги ўйинида — якшанба куни «Астон Вилла»га қарши мавсумнинг якуний баҳсида расман очилади. 2023 йил охирида бошланган трибуна реконструкцияси стадион сиғимини 61 000 дан ортиқ томошабинга етказиб, 7000 дан зиёд янги ўриндиқ қўшди.

«Олийжаноб Шайх Мансур Пепнинг ўн йиллик тарихий меҳнати ва қўшган улкан ҳиссаси эътирофи сифатида ушбу нуфузли мукофот билан тақдирлади. Қайта номлаш доирасида Гвардиола номидаги трибуна олдига Пепнинг ҳайкали ҳам ўрнатилади», — дейилади клуб баёнотида.

Шайх Мансур бин Зайед ал-Наҳаян шундай деди: «Мен доим «Манчестер Сити»да ҳам майдонда, ҳам ундан ташқарида энг яхши инсонлар бўлиши кераклигини айтганман. Ўн йил давомида Пеп айнан шу амбицияларнинг тимсоли бўлди. У клуб ДНКсида ўчмас из қолдирди. Бу из у қўлга киритган кўплаб совринлардан кўра, кўпроқ қандай йўл билан ғалаба қозонгани билан боғлиқ. У мендан ва бутун «Сити» оиласидан чексиз миннатдорчиликка лойиқ, у доимо оиламизнинг бир қисми бўлиб қолади».

«Пеп Гвардиола номидаги трибуна ва унинг олдига ўрнатиладиган ҳайкал Пеп меросининг ушбу футбол клуби, Манчестер шаҳри ва инглиз футболи тарихига абадий муҳрланишини кафолатлайди», — деди «Сити» бошқаруви раиси Ҳалдун ал-Муборак.