Ҳимоячилар Даниэль Карвахаль ва Давид Алаба Мадриднинг «Реал» клуби сафидаги сўнгги ўйинини ўтказади. Diario AS нашрининг хабар беришича, «қаймоқранглилар» бош мураббийи Альваро Арбелоа Ла Лиганинг сўнгги тури доирасида бугун «Атлетик» Бильбаога қарши кечадиган баҳсда иккала футболчини ҳам асосий таркибда майдонга туширади.
Испаниялик қанот ҳимоячиси ва австриялик марказий ҳимоячи «Сантьяго Бернабеу» стадионидаги мухлислар билан хайрлашишади — мавсум якунида иккала футболчи ҳам эркин агент сифатида клубни тарк этади. Катта эҳтимол билан, бу учрашув Альваро Арбелоанинг мадридликлар гранди бош мураббийи сифатидаги фаолиятига ҳам якун ясайди.
«Реал» ва «Атлетик» ўртасидаги баҳс Тошкент вақти билан соат 00:00 да бошланади.
