Таниқли телебошловчи ва «Арсенал» мухлиси Пирс Морган «Манчестер Юнайтед» ярим ҳимоячиси Бруну Фернандешнинг жорий мавсумда Англия Премьер-лигасининг энг яхши футболчиси деб топилганини танқид остига олди.
Гап шундаки, Фернандеш АПЛда мавсумнинг энг яхши ўйинчиси бўлганидан ташқари, профессионал футболчилар ассоциацияси (PFA) томонидан ҳам йилнинг энг яхши футболчиси бўлиш учун асосий даъвогар (81 фоиз эҳтимоллик билан) сифатида кўрилмоқда.
Бу хабар Морганнинг кескин норозилигига сабаб бўлди. У ўз ижтимоий тармоқларида қуйидагича муносабат билдирди:
«Нималар бўляпти ўзи? «Арсенал»ни 22 йиллик танаффусдан кейин чемпионлик сари етаклаган ўйинчи (Деклан Райс назарда тутилмоқда) ўрнига, мавсум давомида муваффақиятсизликларга учраган футболчи қандай қилиб энг яхшиси бўлиши мумкин? Бу ақл бовар қилмайдиган ҳолат», – деб ёзади у.
