Ярим ҳимоячи Эдуардо Камавинга шу ёзда «Реал»ни тарк этмаса керак. Marca нашрининг хабарига кўра, француз футболчиси ёзги трансфер ойнасида мадридликлар сафини тарк этиш бўйича ҳеч қандай таклифни кўриб чиқмоқчи эмас. У келаси мавсумни жорий мавсумдагидан кўра яхшироқ ўтказишни мақсад қилган.

Шунингдек, ярим ҳимоячи «қаймоқранглилар» президенти Флорентино Переснинг ишончини сақлаб қолмоқда. Уларнинг муносабатлари жуда яхши. Бундан ташқари, «Реал» ҳам шу ёзда футболчини сотиб юбориш ниятида эмас.

Эдуардо Камавинга 2021 йилда «Ренн»дан 31 миллион евро эвазига «Реал»га ўтган эди. Унинг мадридликлар билан шартномаси 2029 йилнинг 30 июнига қадар мўлжалланган.

Жорий мавсумда француз футболчиси барча турнирларда 43 та ўйинда майдонга тушиб, 2 та гол урди ва битта голли узатмани амалга оширди.