Германия Кубоги финалида «Штутгарт» устидан қозонилган ғалабадан (3:0) сўнг «Бавария» ярим ҳимоячиси Йозуа Киммих ўз фикрлари билан ўртоқлашди. Мюнхенликлар ўйин давомида ҳисобни фақат 54-дақиқада очишга муваффақ бўлди — Харри Кейн рақиб дарвозасини ишғол қилди. Кейинги дақиқаларда англиялик ҳужумчи яна икки бор гол уриб, хет-трик қайд этди ва рақиблар бунга жавоб қайтара олмади.

«Берлинда яна ўйнаганимиздан жуда хурсандмиз, бу доимо ўзига хос лаҳза. Биринчи бўлим тенг курашлар остида кечди: «Штутгарт» ўйинга биздан яхшироқ киришди, бизда эса яққол голли вазиятлар кўп бўлмади. Танаффусдан кейин эса жуда самарали ҳаракат қилдик. Яхши ўйин ва ҳақли ғалаба», — дея Киммихнинг сўзларини келтирмоқда Bayern & Germany.

Эслатиб ўтамиз, «Бавария» жорий мавсумда Бундеслига ғолиблигини ҳам ишончли тарзда қўлга киритган эди.