«Комо» бош мураббийи Сеск Фабрегас А Серия 38-туридан ўрин олган «Кремонезе»га қарши ўйиндан сўнг ўз келажаги ҳақида фикр билдирди.

Испаниялик мураббий бошқарувидаги жамоа йирик ҳисобда ғалаба қозониб (4:1), мусобақа жадвалида тўртинчи ўринни эгаллади ва Чемпионлар лигаси йўлланмасини қўлга киритди. Фабрегаснинг номи аллақачон нуфузли клублар билан боғланиб келаётган эди, бундай катта муваффақиятдан сўнг эса унинг жамоадан кетиши ҳақидаги гап-сўзлар янада кўпайиши табиий.

«Юз фоиз ишонч билан айта оламанки, мен «Комо»да қоламан. Келажак учун жуда катта мақсадларимиз бор», — дея журналист Николо Скира 39 ёшли мутахассиснинг сўзларини келтиради.

Аввалроқ Фабрегас Англиянинг номи ошкор этилмаган иккита клубидан келган таклифларни рад этгани ҳақида хабар берилганди.