Ла-Корунья шаҳри шарафини ҳимоя қилувчи Испаниянинг «Депортиво» клуби Ла Лигага қайтди. Бунга Сегунда мусобақасининг сўнггидан олдинги турида «Вальядолид» устидан қозонилган 2:0 ҳисобидаги ғалабадан сўнг эришилди.

Ушбу ғалабадан кейин жамоа турнир жадвалида иккинчи ўринни нақд қилиб олди ва «Альмерия»дан 6 очкога илгарилаб кетди. Сўнгги тур олдидан «Депортиво»да биринчи ўринни эгаллаш имконияти ҳам сақланиб қолмоқда.

Жамоани ўтган йилдан бошлаб, ўзининг футболчилик фаолиятини «Барселона»да бошлаган маҳаллий мутахассис Антонио Идальго бошқариб келмоқда.

Эслатиб ўтамиз, «Депортиво» ўз тарихида 2000 йилда мамлакат чемпиони бўлган, шунингдек, унинг ҳисобида 2 та Испания кубоги, 3 та Суперкубок ва Интертото кубоги мавжуд. Клуб 2017/18 йилги мавсумдан буён элита дивизионида иштирок этмаётган эди.