«Комо» бош мураббийи Франсеск Фабрегас клубни тарк этмаслигини маълум қилди. 39 ёшли испаниялик мутахассис қўл остида жамоа 2025/26 йилги мавсумни Италия А Сериясини 4-ўринда якунлаб, Чемпионлар лигаси йўлланмасини қўлга киритди.
«Клуб президенти ва директори билан узоқ суҳбатлашдик. Биз кейинги мавсум учун концепцияни тасдиқлаб олдик. Бу ердалигимдан жуда хурсандман. Мен ҳамон кўп нарсани ўрганмоқдаман. Биз жамоада ўзига хос менталитетни шакллантиряпмиз.
Клубнинг ўсиши жуда тез бўлди — биз икки ярим йилдан буён кутилганидан ҳам юқори натижаларни қайд этиб келмоқдамиз. Бугундан бошлаб биз Европада ўйнашимиз керак бўлган мураккаб ва ноодатий мавсумга тайёргарликни бошлаймиз.
Биз эҳтиёткор бўлишимиз керак. Агар «Сантьяго Бернабеу» [«Реал»га қарши] ёки «Камп Ноу» [«Барселона»га қарши] стадионларига етарлича тайёргарликсиз борсак, 6 та гол ўтказиб юборамиз. Шу сабабли даражамизни оширишимиз ва пухта тайёргарлик кўришимиз шарт», — деди Фабрегас.
