«Вест Хэм» клуби АПЛдан тушиб кетгач, бош мураббий Нуну Эшпириту Сантунинг жамоадаги фаолияти сўроқ остида қолмоқда. The Guardian нашрининг ёзишича, лондонликлар раҳбариятида португалиялик мутахассиснинг тақдири бўйича ягона тўхтамга келинмаган.
Душанба куни Нуну раҳбарият билан музокара ўтказди, якуний қарор эса ҳафта охиригача эълон қилиниши кутилмоқда. Клубнинг иккинчи йирик акционери Даниэль Кретинский мураббийни ишдан бўшатишга қарши чиқмоқда. Энг йирик акционер Дэвид Салливан эса мураббийга нисбатан у қадар ишонч билдирмаяпти.
Эслатиб ўтамиз, Нуну ўтган йилнинг сентябрь ойида Грэм Поттер ўрнига келган ва 3 йиллик шартнома имзолаган эди. Келишувда клуб мураббийни товон пули тўламасдан ишдан бўшатиши мумкинлиги ҳақида банд бор. Мураббийликка номзодлар сифатида Скотт Паркер, Славен Билич ва Гари О’Нил номлари тилга олинмоқда.
