«Кристал Пэлас» вингери Эванн Гессан ноёб натижа қайд этди. Чоршанба куни 24 ёшли футболчи Конференциялар лигаси ғолибига айланди: у «Райо Вальекано»га қарши кечган ва минимал ҳисобдаги ғалаба билан якунланган финал учрашувининг сўнгги дақиқаларида майдонга тушди.

Атиги бир ҳафта аввал эса ивуарлик футболчи Европа лигаси ғолибига айланган эди — «Астон Вилла» финалда «Фрайбург»ни йирик ҳисобда (3:0) мағлуб этди. Бу бир футболчининг бир мавсумда иккита еврокубокни қўлга киритган тарихдаги илк ҳолатидир.

Эванн Гессан қишда «Астон Вилла»дан «Кристал Пэлас»га ижара асосида ўтган эди. У «Вилла» сафида Европа лигасининг умумий босқичида еттита ўйинда майдонга тушиб, иккита гол уришга улгурганди. Кейин эса «бургутлар» таркибида Конференциялар лигасида олтита ўйин ўтказиб, бир маротаба рақиб дарвозасини ишғол қилди.