«Ювентус» «Ливерпуль»нинг Алиссон борасидаги режаларини имкон қадар тезроқ билиб олишни истамоқда. Аввалроқ мерсисайдликлар 33 ёшли дарвозабон билан шартномани бир йилга узайтиришга тайёрлиги, туринликлар эса бразилиялик футболчига узоқ муддатли шартнома таклиф қилгани хабар қилинганди.

Tuttosport нашрига кўра, «Ливерпуль» ҳозирча Алиссонни қўйиб юбориш мақсадга мувофиқлигига ишончи комил эмас. Клуб бразилиялик посбонни олиб қолишга ва Георгий Мамардашвилини ижарага беришга қарор қилиши мумкин. Sportitalia маълумотига кўра, грузиялик дарвозабон «Ювентус» ва «Интер»га таклиф қилинган.

«Юве» аллақачон Алиссон бўйича илк таклифни юборган ва музокараларни давом эттиришга интилмоқда, чунки дарвозабоннинг ўзи ҳам жамоага ўтишга тайёр. Таъкидланишича, футболчи ва Италия клуби «Ливерпуль»дан Жаҳон чемпионати бошланишигача жавоб кутмоқда.

Агар мерсисайдликлар Алиссонни шартномасининг сўнгги йилида олиб қолишга қарор қилса, «Ювентус» бошқа дарвозабон излашга мажбур бўлади. Бу ҳолатда асосий вариантлардан бири «Фиорентина» аъзоси Давид Де Хеа ҳисобланади.