«Yuventus» «Liverpul»ning Alisson borasidagi rejalarini imkon qadar tezroq bilib olishni istamoqda. Avvalroq mersisaydliklar 33 yoshli darvozabon bilan shartnomani bir yilga uzaytirishga tayyorligi, turinliklar esa braziliyalik futbolchiga uzoq muddatli shartnoma taklif qilgani xabar qilingandi.

Tuttosport nashriga ko‘ra, «Liverpul» hozircha Alissonni qo‘yib yuborish maqsadga muvofiqligiga ishonchi komil emas. Klub braziliyalik posbonni olib qolishga va Georgiy Mamardashvilini ijaraga berishga qaror qilishi mumkin. Sportitalia ma’lumotiga ko‘ra, gruziyalik darvozabon «Yuventus» va «Inter»ga taklif qilingan.

«Yuve» allaqachon Alisson bo‘yicha ilk taklifni yuborgan va muzokaralarni davom ettirishga intilmoqda, chunki darvozabonning o‘zi ham jamoaga o‘tishga tayyor. Ta’kidlanishicha, futbolchi va Italiya klubi «Liverpul»dan Jahon chempionati boshlanishigacha javob kutmoqda.

Agar mersisaydliklar Alissonni shartnomasining so‘nggi yilida olib qolishga qaror qilsa, «Yuventus» boshqa darvozabon izlashga majbur bo‘ladi. Bu holatda asosiy variantlardan biri «Fiorentina» a’zosi David De Xea hisoblanadi.