Франциялик машҳур собиқ ҳужумчи Давид Трезеге Душан Влаховичнинг ўйинидаги муаммо нимада эканини очиқлади. Сербиялик форвард ёзда эркин агент сифатида «Ювентус»ни тарк этиши кутилмоқда.

«Влахович – ажойиб футболчи, аммо «Ювентус» ундан қаҳрамонликларни жуда узоқ кутди. У битта яхши ўйин кўрсатиши мумкин, лекин муваффақиятни мустаҳкамлай олмайди ва барқарорликка эришишга қодир эмас. Айни шу гапларни Жонатан Дэвид ҳақида ҳам айтиш мумкин. Аслида, қисқа вақт ичида катта фойда келтирган Коло-Муанини сақлаб қолиш керак эди», – деди Трезеге La Gazzetta dello Sport нашрига берган интервьюсида.

Эслатиб ўтамиз, Душан Влахович ўтган мавсумда 23 та учрашувда майдонга тушиб, 10 та гол киритишга муваффақ бўлди.