Кэлвин Филлипсни ўз таркибига қўшиб олиш Хосеп Гвардиола қўл остидаги «Манчестер Сити» томонидан йўл қўйилган энг катта трансфер хатоларидан бирига айланди. 2022 йилда «шаҳарликлар» ярим ҳимоячини «Лидс»дан деярли 50 миллион евро эвазига сотиб олишган эди.

Журналист Жейсон Бёртнинг маълумотига кўра, испаниялик мутахассис Филлипсни бошқа бир ярим ҳимоячи – Деклан Райсдан устун кўрган. Гвардиола ўша пайтдаги «Лидс» юлдузи кенгроқ диапазонли пасларга эга экани ва майдонни яхшироқ «сканер» қилишига ишонган.

Кэлвин Филлипс ҳамон «Сити»га тегишли, бироқ бутун вақт давомида жамоа сафида атиги 32 та ўйин ўтказган. 30 ёшли футболчи ўтган мавсумнинг иккинчи қисмини ижара асосида «Шеффилд Юнайтед»да ўтказди. Деклан Райс эса 2023 йилнинг ёзида «Вест Хэм»дан «Арсенал»га 116,6 миллион евро эвазига ўтган эди. Яқинда 27 ёшли футболчи «Арсенал» сафида Англия Премьер-лигаси ғолиби бўлди.