"Рома" клуби ўз расмий сайтида спорт директори Фредерик Массара клубни тарк этишини маълум қилди. Томонлар шартномани ўзаро келишувга кўра бекор қилган.

"Мен раҳбариятга ўзим учун қадрли бўлган муҳитга қайтиш имкониятини бергани учун миннатдорчилик билдираман. Ишонаманки, бир йил давомида клуб муваффақиятли келажак учун пойдевор қўйди ва "Рома"га алоқадор бўлган ҳар бир инсонга улкан муваффақиятлар тилайман", – дейилади клуб баёнотида Массаранинг сўзлари.

Массара 2011 йилдан 2019 йилгача "Рома"нинг маъмурий тузилмасида ишлаган, шундан сўнг "Милан" ва "Ренн" клубларида спорт директори лавозимида фаолият юритган. Рим клубига у 2025 йилнинг ёзида қайтган эди.

Январь ойида Массаранинг "Рома" мураббийи Жан Пьеро Гасперини билан муносабатлари таранглашгани ҳақида маълумотлар пайдо бўлганди. Апрель ойида эса Гасперини билан бўлган зиддият фонида раҳбарият маслаҳатчиси Клаудио Раньери ҳам клубдан кетган эди.