«Аталанта» клуби «Ювентус» ва «Наполи» жамоаларининг собиқ топ-менеджери Кристиано Джунтоли спорт директори лавозимига тайинланганини расман эълон қилди.
«Аталанта клуби ўзининг қобилияти, тажрибаси ва теран қарашлари билан юқори даражада ўзини кўрсата олган футбол менежери — Кристиано Джунтоли клуб спорт тузилмасининг спорт директори этиб тайинланганини мамнуният билан эълон қилади», — дейилади Бергамо клуби расмий сайтида берилган баёнотда.
54 ёшли Джунтоли «Наполи» клубида саккиз мавсум (2015–2023) фаолият юритган ва жамоани 2022/23 йилги мавсум якунида охирги 30 йил ичидаги илк Скудеттога етаклаб келган раҳбарият таркибида бўлган эди. Ушбу муваффақиятли мавсумдан сўнг у «Ювентус»га ўтди, бироқ Туринда бор-йўғи икки йил ишлаб, истеъфога чиқарилди. Мутахассис 2024/25 йилги мавсум якунидан буён ишсиз юрган эди.
