«Порту» ҳужумчиси Виллиам Гомес Европанинг бир қатор етакчи клублари қизиқиши доирасига тушиб қолди. AS нашри хабарига кўра, «Манчестер Юнайтед» 20 ёшли футболчига фаол қизиқиш билдирмоқда. Англия Премьер-лигасининг бронза медали соҳиби Гомесни қанот ҳужумларини кучайтириш учун асосий вариант сифатида кўрмоқда.
«Манчестер Юнайтед»дан ташқари, ёш иқтидор эгасини мадридлик «Атлетико», шунингдек, «Арсенал», «Ньюкасл» ва «Рома» жамоалари ҳам кузатмоқда. Бироқ манбанинг қайд этишича, трансферни амалга ошириш осон кечмайди. Португалия клуби Гомеснинг трансферини муҳокама қилиш истагида эмас ва уни фақат 80 миллион евро миқдоридаги товон пули эвазига қўйиб юборишга тайёр.
2025/2026 йилги мавсумда Гомес 46 та учрашувда майдонга тушиб, 13 та гол урди ва иккита голли узатмани амалга оширди. Transfermarkt маълумотларига кўра, футболчининг бозор қиймати 25 миллион еврони ташкил этади.
