«Милан» ҳужумчиси Рафаэл Леау яқин вақт ичида клубни тарк этишга тайёр эканини тан олди. 26 ёшли футболчи бўлажак трансфер ойнасида муҳитни ўзгартириш ниятида эканини очиқ-ойдин маълум қилди.
«Менимча, мен «Милан»га бера оладиган ҳамма нарсамни бердим. Клуб ўсишимга ёрдам берди, қийин дамларда қўллаб-қувватлади. Ўз номимни «Милан» тарихига кирита олганимдан хурсандман, аммо ҳар кимнинг ўз орзулари, мақсадлари ва амбициялари бор. Менга янги чақириқ керак – ўзимни бошқа чемпионатда синаб кўрмоқчиман. Тайёр эканимни ҳис қиляпман. Вақти келди», — деди португалиялик футболчи SportTVга берган интервьюсида.
Рафаэл Леау 2019 йилдан буён «россонерилар» шарафини ҳимоя қилиб келмоқда. Футболчининг бозор қиймати Transfermarkt портали томонидан 50 миллион еврога баҳоланмоқда, унинг «Милан» билан шартномаси 2028 йилгача амал қилади.
