«ПСЖ» ярим ҳимоячиси Уоррен Заир-Эмери Чемпионлар лигаси тарихига кирди. У иккита финалда майдонга тушиб, уларнинг иккаласида ҳам ғолиб чиққан тарихдаги энг ёш футболчига айланди.

Ўтган йили у «Интер»га қарши финалнинг (5:0) энг сўнгги дақиқаларида майдонга тушган бўлса, бу сафар «Арсенал»га қарши ўйинда (1:1, пенальтилар бўйича 4:3) иштирок этди. 20 ёшу 2 ойлик бўлган Заир-Эмери Йохан Нескенснинг кўрсаткичини янгилади. Нескенс «Аякс» билан ўз вақтида иккинчи бор ЕЧЛ ғолиби бўлганида 20 ёшу 8 ойлик эди.

Якунланган мавсумда парижликлар тарбияланувчиси ҳисобланган Заир-Эмери клуб миқёсида жами 54 та ўйинда майдонга тушиб, 3 та гол урди ва 5 та голли узатмани амалга оширди.