Лондоннинг «Арсенал» клуби ярим ҳимоячиси Микель Мерино жамоасининг Чемпионлар лигаси финалида «ПСЖ»дан учралган мағлубиятига изоҳ берди. Микель Артета шогирдлари пенальтилар сериясида имкониятни бой беришди. Ўйиннинг асосий ва қўшимча вақтлари 1:1 ҳисобида якунланган эди.
«Оғриқ кучли, аммо ғурур ундан ҳам кучлироқ. Ушбу гўзал мавсумдаги қўллаб-қувватлашингиз учун барчангизга раҳмат. Эртами-кечми, клуб бу совринга лойиқ бўлганидек, уни албатта қўлга киритади», — деб ёзди испаниялик ярим ҳимоячи ижтимоий тармоқларда.
Яқинда оғир жароҳатдан фориғ бўлган Мерино финалда иштирок этмади – у захира ўриндиғида қолди.
«ПСЖ» кетма-кет иккинчи мавсум Чемпионлар лигасида ғолиб чиқди. «Арсенал» эса ҳали бу турнирда зафар қучмаган.
