Франциянинг «ПСЖ» клуби Чемпионлар лигаси финалида Англиянинг «Арсенал» жамоасини мағлуб этгач, 2026 йилги «Олтин тўп» учун курашдаги ҳолат кескин ўзгарди, деб хабар бермоқда Sports.kz.

Парижликлар Чемпионлар лигасида кетма-кет иккинчи бор ғолибликни қўлга киритди. Финалда асосий ва қўшимча вақт 1:1 ҳисобида якунланганидан сўнг, пенальтилар сериясида «Арсенал» мағлуб этилди. Бу муваффақият жамоа етакчиларининг жаҳон футболидаги энг нуфузли индивидуал соврин учун курашдаги имкониятларини сезиларли даражада оширди.

Score90 нашрининг 2026 йил июнь ойи учун янгиланган рейтингига кўра, энди «Олтин тўп»нинг асосий фаворити «ПСЖ» вингери Усмон Дембеле ҳисобланмоқда. Франциялик футболчи биринчи ўринга кўтарилиб, Ламин Ямални ортда қолдирди. «Барселона» иқтидори эса иккинчи поғонага тушиб кетди.

«Олтин тўп» учун асосий даъвогарлар топ-5 талиги:

1. Усмон Дембеле («ПСЖ»)
2. Ламин Ямал («Барселона»)
3. Килиан Мбаппе («Реал»)
4. Харри Кейн («Бавария»)
5. Хвича Кварацхелия («ПСЖ»)

Таъкидлаш жоиз, Дембеле 2025 йил якунларига кўра ҳам «Олтин тўп» соҳиби бўлган эди.

Ушбу рўйхатда илк бор Грузия миллий терма жамоаси вингери Хвича Кварацхелия ҳам пайдо бўлди. У якунланган Чемпионлар лигаси мавсумида 16 та учрашувда майдонга тушиб, 10 та гол ва 6 та голли узатма муаллифи бўлди.