2026 йилги Жаҳон чемпионатида ишлатиладиган тўплар ўзида датчик (ҳаракат сенсори) билан жиҳозланган ва уларни ўйиндан олдин зарядлаш талаб этилади. Бу ҳақда Newsweek нашри Adidas компанияси вакилига таяниб хабар бермоқда.
Датчик ҳар бир тегинишни кузатиб боради ва видеоассистент ҳакамларга (VAR) офсайд, қўл билан ўйнаш ва бошқа эпизодлар бўйича қарор қабул қилишда ёрдам беради. Қурилма олти соатгача ишлаш имкониятига эга.
«Ҳар бир тўп ўйин бошланишидан олдин зарядланади. Батареялар уларнинг ўйин давомийлигидан бир неча баробар узоқроқ ишлашига имкон беради. Турнирларга хизмат кўрсатиш даврида бирор марта ҳам тўпни қуввати тугагани учун алмаштиришга тўғри келмаган», — деди Adidas вакили.
Датчик тўпнинг марказида жойлашган 2022 йилги Жаҳон чемпионатидан фарқли ўлароқ, бу сафар у тўпнинг ён томонига ўрнатилган. Ўтган турнирда қайта зарядланувчи индукцион батарея ишлатилган эди.
Жаҳон чемпионати-2026 11 июндан 19 июлгача АҚШ, Канада ва Мексикада бўлиб ўтади. Турнирда илк бор 48 та жамоа иштирок этади.
