«Монако» Филипе Луисда тегишли лицензия йўқлиги сабабли жарима тўлаши мумкин.

Аввалроқ 40 ёшли мутахассис икки йиллик шартнома имзолаб, Лига 1 вакилини бошқариши маълум бўлган эди.

Бразилиялик мураббийни тайинлашга «Байер» ҳам қизиқиш билдирган, бироқ немис клубида Филипенинг Европа мамлакатларида ишлашга рухсат берувчи мураббийлик лицензияси йўқлиги сабабли муаммо келиб чиққан. Sky Sport журналисти Флориан Плеттенбергнинг ёзишича, унинг лицензияси фақат Жанубий Америка футбол конфедерациясига (КОНМЕБОЛ) аъзо давлатларга амал қилади.

Леверкузен клуби бу масалани УЕФА билан муҳокамалар давомида ҳал қилишга уринган, аммо бу кўп вақт талаб қиларди, мураббий эса кутишни истамаган.

«Монако» эса ўз навбатида, Филипе Луис бошқарувидаги ҳар бир ўйин учун 25 минг еврогача жарима тўлашга тайёр. Таъкидланишича, агар КОНМЕБОЛ лицензияси эгаси бош мураббий сифатида 3 йил ишлаган бўлса, лицензия автомат равишда УЕФА лицензияси билан тенг мақомга эга бўлади. Филипе Луис эса «Фламенго»ни тахминан 1,5 йил бошқарган.