ПСВ жамоасининг ўнг қанот ҳимоячиси Сержиньо Дест «Бавария»нинг эътиборини тортди. Мюнхен клуби ҳозирда эйндховенликлар ярим ҳимоячиси Исмаэль Сайбари борасида музокаралар олиб бормоқда, аммо шу билан бирга Дестга ҳам қизиқиш билдирмоқда. Бу ҳақда журналист Рик Эльфринк хабар берди.
Америкалик футболчи учун тахминан 20-25 миллион евро тўлашга тўғри келади. «Бавария» учун бу шартлар қанчалик мақбул экани ҳозирча номаълум, чунки клуб аввал Сайбари трансферини якунлаб, ўз таркибидаги баъзи ўйинчиларни сотишни режалаштирмоқда.
Катта эҳтимол билан, барча масалалар Жаҳон чемпионатидан кейин ҳал бўлади.
Сержиньо Дест 2024 йилда эркин агент сифатида «Барселона»дан ПСВга ўтган эди. Ўтган мавсумда 25 ёшли футболчи Нидерландия чемпионлари сафида 38 та ўйинда майдонга тушиб, 2 та гол урди ва 8 та голли узатмани амалга оширди.
