Англия терма жамоаси ярим ҳимоячиси Кобби Майну мураббий Майкл Кэррикнинг унинг ривожланишига қўшган ҳиссаси ва 2026 йилги Жаҳон чемпионати қайдномасига киришида тутган ўрнини алоҳида қайд этди. Кэррик жорий йилнинг январ ойида «Манчестер Юнайтед» бошқарувини қўлга олди ва мавсумнинг иккинчи қисмида 21 ёшли ярим ҳимоячига мунтазам ўйин амалиётини тақдим этди.
Янги мураббий келгунига қадар Майну майдонда бор-йўғи 302 дақиқа ўтказган ва АПЛ ўйинларида ҳеч қачон асосий таркибда майдонга тушмаган эди. Кэррик қўл остида эса ярим ҳимоячи асосий таркиб футболчисига айланди ва 17 та ўйиннинг фақат биттасини ўтказиб юборди.
«Агар у мени майдонга туширмаганида, ҳозир бу ерда бўлмасдим. Шу боис мен бунинг учун ундан доимо миннатдор бўламан», — дея Майнунинг сўзларини келтиради talkSPORT.
Эслатиб ўтамиз, Жаҳон чемпионати гуруҳ босқичида Англия терма жамоаси Хорватия, Панама ва Гана терма жамоалари билан куч синашади.
