«Ливерпуль» футболчиси Федерико Кьеза жамоадоши Кёртис Жонснинг Миланнинг «Интер» клубига ўтиши мумкинлиги ҳақидаги хабарларга муносабат билдирди. «Нерадзуррилар»нинг инглиз ярим ҳимоячисига қизиқиш билдираётгани ҳақидаги маълумотлар матбуотда анчадан бери айланиб юрибди. А Серия гранди ушбу трансфер устида фаол иш олиб бораётгани маълум.

«Кёртис мендан Италиядаги ҳаёт ҳақида сўради. Мен унга у ер ажойиблигини, қолаверса, иқлими Ливерпулдагига қараганда анча ёқимли эканини айтдим. Жонс ҳақиқатан ҳам техник жиҳатдан жуда иқтидорли, шунинг учун «Интер»нинг унга бўлган қизиқиши мутлақо асосли», — деди Кьеза La Gazzetta dello Sport нашрига берган интервьюсида.

Эслатиб ўтамиз, 28 ёшли италиялик футболчининг ўзи ҳам ватанига қайтишга шайланмоқда — у ҳатто «Ювентус»га ўтишга тайёр эканлигини очиқчасига эълон қилган.