«Ливерпуль» вингери Федерико Кьеза А Серияга қайтишга тайёр эканлигини маълум қилди. 28 ёшли футболчи «қизиллар»нинг асосий таркибидан муқим жой ололмади, шу сабабли миш-мишлар уни яна Италия клубларидан бирига ўтиши билан боғламоқда.
«Мен ҳеч қачон «Ювентус»дан ўз хоҳишим билан кетмаган бўлардим. Ўша пайтда клубдан катта пул талаб қилганим ҳақида кўп ёзишди, лекин ҳаммаси бутунлай бошқача эди: аслида менга шартномани узайтириш бўйича умуман таклиф беришмаган. Мотта ва Жунтоли мендан янги клуб топишимни сўрашганди. Мен «Ювентус»ни яхши кўраман ва у ерга жон-дилим билан қайтган бўлардим», — деди Кьеза La Gazzetta dello Sport нашрига берган интервьюсида.
Эслатиб ўтамиз, «Ливерпуль» ушбу футболчини 2024 йилнинг август ойи кунларида «кекса синьора»дан 12 миллион евро эвазига сотиб олган эди.
