«Ньюкасл» клубининг италиялик ярим ҳимоячиси Сандро Тонали ҳамон АПЛнинг бошқа бир клуби — «Манчестер Юнайтед»нинг трансфер шорт-листидан (номзодлар рўйхатидан) жой олиб турибди. Бу ҳақда «Caught Offside» нашри журналистлари хабар бермоқда.

Манбанинг маълум қилишича, «қизил иблислар» раҳбарияти 26 ёшли ярим ҳимоячини сотиб олиш учун 80-90 миллион евро ажратишга тайёр. «Қарғалар» эса, ўз навбатида, жамоанинг етакчи футболчиси билан хайрлашишни унчалик исташмаяпти.

Тоналининг «Ньюкасл» билан амалдаги шартномаси 2028 йилнинг ёзига қадар мўлжалланган. Футболчининг трансфер бозоридаги нақд қиймати 80 миллион еврога баҳоланмоқда. Якунланган мавсумда Сандро барча турнирларда 53 та учрашувда майдонга тушиб, ўз ҳисобига 3 та гол ва 7 та голли узатмани ёздириб қўйган эди.