Австрия футбол федерацияси президенти Йозеф Прёлль германиялик мутахассис Ральф Рангникнинг «Милан»га кетишига қўйиб юбормоқчи эмаслигини шама қилди — у Рангникни бундан буён ҳам, то 2028 йилги Европа чемпионатига қадар Австрия миллий терма жамоаси устози сифатида кўрмоқда.

«Биз у билан кўп марта учрашдик ва келгусидаги ҳамкорликни — 2028 йилгача бўлган даврни муҳокама қилдик. У бизнинг имкониятларимизни билади, энди унинг қарорини кутяпмиз», — дея Прёллнинг сўзларини келтиради derbyderbyderby.it.

Қайд этиш жоизки, «Милан» клуби 16 июнга қадар бир қарорга келиши зарур. Бу эса тахминан ўн кундан кейин клубнинг раҳбарият тизимига кимлар киришини билишимиз кераклигини англатади.