Ҳужумчи Энтони Гордон яқиндагина «Барселона» клубига ўтгани ҳақида яна бир бор фикр билдирди.

«Бу бироз телбавор икки ҳафта бўлди, лекин булар мен ва оилам учун ҳаётимдаги энг бахтли икки ҳафта бўлди, деб айта оламан. Бу ҳақиқатан ҳам ажойиб эди, чунки мен жуда ёшлигимдан яқинларимга мана шу даражага чиқишимни айтардим. Улар мени табриклашди ва шунга ўхшаш қувончли ишлар бўлди. Умуман олганда, мен шунчаки «Барселона»да ўйнашнинг ўзи билан чекланиб қолмоқчи эмасман. Мен барча совринларни қўлга киритишни истайман», — деди Гордон talkSPORT нашрига берган интервьюсида.

Эслатиб ўтамиз, Энтони Гордон «Барселона» билан 2031 йилнинг ўрталарига қадар мўлжалланган шартнома имзолади. Бунгача футболчи Англиянинг «Эвертон», «Престон» ва «Ньюкасл» клубларида тўп сурган.