«Ювентус» клуби ва ҳужумчи Душан Влахович шартномани узайтириш борасида барибир келишувга эриша олишмади. Томонлар узоқ вақт давомида музокаралар олиб боришди, бироқ ўзаро муроса йўлини топишнинг имкони бўлмади — эндиликда сербиялик футболчи эркин агентга айланади.
«Tuttosport» нашрининг хабар беришича, Влахович Турин клуби ўзига нисбатан сотқинлик қилгандек ҳис этмоқда. Форвард ўзини жамоа етакчиси сифатида кўрган ва Лучано Спаллетти қўл остидаги «кекса синьора»нинг янги лойиҳаси бир қисмига айланишни истаган эди. Бироқ клуб раҳбарияти футболчининг молиявий талабларига яқин ҳам келмади ва унга ён босишни хоҳламади.
Душан Влахович 2022 йилнинг январь ойидан буён «Ювентус» шарафини ҳимоя қилиб келаётган эди. 26 ёшли ҳужумчи «бьянконерилар» сафида жами 168 та ўйин ўтказиб, 68 та гол уришга муваффақ бўлган.
