Бразилия терма жамоаси бош мураббийи Карло Анчелотти Рафинья Диас ва Винисиус Жуниор тандеми (боғлами) ҳақида ўз фикрларини билдирди. Улар иштирок этган ва 7 июнь куни бўлиб ўтган ўртоқлик учрашувида «пентакампеонлар» Миср терма жамоасини 2:1 ҳисобида мағлуб этишди.
«Ушбу жуфтлик майдонда жуда яхши таассурот қолдирмоқда. Уларнинг сифатли ҳамкорлиги эвазига биз кўплаб вазиятлар яратяпмиз, айниқса, бугунги учрашув жуда яхши чиқди», — дея Анчелоттининг сўзларини келтирмоқда «Globo» нашри.
Шу билан бир қаторда, Анчелотти ўйиннинг сўнгги қисмидан норози бўлди. Сабаби, баҳснинг охирги 30 дақиқасида жамоа ўйин назоратини етарли даражада ушлаб тура олмаган.
Эслатиб ўтамиз, 14 июнь куни Жаҳон чемпионати гуруҳ босқичининг 1-тури доирасида Бразилия терма жамоаси Марокашга қарши майдонга тушади. Учрашув Тошкент вақти билан соат 03:00 да бошланади.
