«Барселона» Ханс-Дитер Флик кетганидан кейин бош мураббийликка Франсеск Фабрегасни тайинламоқчи.
Catalunya Ràdioга таяниб As нашрининг хабар беришича, Деку бошчилигидаги «Барселона» спорт блоки Фабрегасни келажакда жамоа бош мураббийлигига асосий номзод сифатида кўрмоқда. Каталонияликлар «Комо» устози билан 2028 йилда, яъни Фликнинг шартномаси якунига етганидан кейин амалга ошиши мумкин бўлган тайинлов бўйича аллақачон алоқага чиқишган.
Шунингдек, «Барселона» бир неча ой олдин ҳам Фабрегас масаласида «Комо» клубига мурожаат қилгани айтилмоқда. Жоан Лапортанинг маслаҳатчиси Алехандро Эчеваррия 2028 йилдан кейин Франсескнинг жамоага тайинланиши эҳтимоли учун бевосита масъул ҳисобланади.
